Հայաստանի յուրաքանչյուր քաղաք ձեզ կտեղափոխի մի ուրիշ աշխարհ։

01

Երևան

Մայրաքաղաք Երևանը ավելի քան 2800 տարվա պատմություն ունի՝ նույնիսկ Հռոմից հին է։ Այն հնի ու ժամանակակիցի հիասքանչ համադրություն է՝ բազմաթիվ տեսարժան վայրերով, զբոսանքի համար հաճելի ու հարմարավետ փողոցներով, ինչպես նաև ռեստորանների և սրճարանների մեծ ընտրությամբ։ Կասկադի գեղեցիկ համալիրից մինչև Կոնդի գունեղ ու հին թաղամասը՝ ձեզ կգրավի իր հմայքով և երկար կմնա ձեր հիշողություններում։

02

Գյումրի

Արվեստի և արհեստների քաղաք Գյումրին ձեր ճանապարհորդության ամենահետաքրքիր կանգառներից մեկը կլինի։ Այս քաղաքը ձեզ կտանի արվեստի և ճարտարապետական հրաշալիքների հիասքանչ աշխարհ։ Պատահական չէ, որ այն համարվում է Հայաստանի մշակութային կենտրոն։ Վայելե՛ք Կումայրիի պատմական թաղամասի սև տուֆից կառուցված շենքերի գեղեցկությունը։ Գյումրիում կան բազմաթիվ թանգարաններ և պատկերասրահներ։ Հատկապես խորհուրդ է տրվում այցելել «Գյումրու ժողովրդական ճարտարապետության և քաղաքային կենցաղի թանգարան»՝ զգալու քաղաքի կոլորիտը և ջերմ մթնոլորտը։ Գետի ափին վայելեք համեղ ուտեստներ, իսկ որպես աղանդեր՝ քաղաքի հայտնի յաղլին ու տեղական բույսերով պատրաստված մի բաժա

03

Դիլիջան

Մաքուր օդ և հիասքանչ բնապատկերներ որոնող այցելուների համար Դիլիջանը լավագույն ընտրությունն է։ Անտառներով շրջապատված իր դիրքի շնորհիվ այն համարվում է կատարյալ ուղղություն կարճատև հանգստի համար՝ առաջարկելով տպավորիչ տեսարաններ բնության սիրահարներին։ Այցելե՛ք Պարզ լիճ կամ կազմակերպեք քայլարշավ Գոշավանքից դեպի Գոշ լիճ՝ անզուգական արահետով։

04

Ծաղկաձոր

Եթե սիրում եք ձմեռային սպորտաձևերը, այցելե՛ք Ծաղկաձոր։ Թեև նրա հիանալի բնությունը կարելի է վայելել տարվա բոլոր եղանակներին, Ծաղկաձորը հատկապես հայտնի է որպես Հայաստանի լեռնադահուկային հանգստավայր։ Սահե՛ք դահուկներով կամ սնոուբորդով Թեղենիս լեռան լանջերին, կամ փորձե՛ք զիփլայն՝ իրական ադրենալին զգալու համար։ Ընթրե՛ք տեղական ճաշարանում՝ վայելելով հայկական խոհանոցի հիանալի համերը։

05

Էջմիածին

Էջմիածինը ոչ միայն բոլոր հայերի գլխավոր հոգևոր կենտրոնն է, այլև ճարտարապետության սիրահարների համար գրավիչ վայր։ Քաղաքի փողոցներով անցնելիս ձեր ուշադրությունը կգրավեն նեոդասական ոճով կառուցված բնակելի շենքերը։ Այցելե՛ք Մայր Աթոռ Սուրբ Էջմիածին, Սուրբ Հռիփսիմե և Սուրբ Գայանե եկեղեցիներ։ Եթե ցանկանում եք հոգևոր և գեղագիտական բավարարություն ստանալ, Էջմիածինը պարտադիր ներառեք ձեր այցելության ցանկի մեջ։

06

Ջերմուկ

Ջերմուկը Հայաստանի խոշոր առողջարանային քաղաքներից մեկն է, որը հայտնի է իր հանքային ջրերով։ Այցելե՛ք Արփա գետի կիրճում գտնվող Ջերմուկի ջրվեժը կամ բնական տաք աղբյուրները՝ ջիպերով արշավի ընթացքում։ Ջերմուկում չմոռանաք փորձել սոճու կոնի օշարակը և լեռնային մաստակը։

07

Գորիս

Գորիսն իր տպավորիչ գետափնյա հատակագծի շնորհիվ, տարվա բոլոր եղանակներին բազմաթիվ այցելուների է հյուրընկալում։ Այս կենսուրախ քաղաքը հայտնի է յուրօրինակ ճարտարապետությամբ, որն առանձնահատուկ հմայք է պարգևում նրան։ Գորիսի բազմաթիվ տներ 19–20-րդ դարերում կառուցված երկհարկանի շինություններ են՝ գեղեցիկ կամարակապ դռներով և քարե ցանկապատերով։ Հեռվում երևում են նաև հին քարե բուրգեր և քարանձավային բնակավայրեր։

08

Մեղրի

Չպետք է բաց թողնել Մեղրի այցելելու հնարավորությունը՝ Հայաստանի ամենաքաղցր քաղաքը, որի անունը հենց «մեղր» բառից է առաջացել։ Մեղրիի փողոցներով շրջելիս կտեսնեք բնական ձևով չորացված մրգերի գեղեցիկ վարագույրներ։ Անպայման փորձե՛ք տեղական չորացրած թուզն ու արքայանարինջը։ Այցելե՛ք նաև Մեծ և Փոքր Թաղերում գտնվող եկեղեցիները։ Սուրբ Հովհաննեսի և Սուրբ Աստվածածնի եկեղեցիների ներքին որմնանկարները անպայման արժե տեսնել։

09

Ստեփանավան

Ձորագետի ափին գտնվող Ստեփանավանը փոքրիկ քաղաք է Հայաստանի հյուսիսում, որը իդեալական վայր է կարճ ուղևորության, հանգստի և բնության հաճույքները վայելելու համար։ Ձեզ կհմայեն ալպիական մարգագետիններից խիտ անտառների հարթ անցումները, ինչպես նաև Ձորագետի կիրճի հոգեպարար տեսարանները, որոնք կբացվեն ձեր առջև կամրջից։